傻仔

在這麼沉重的幾首歌之後，來一首輕鬆一點的吧！寫得很輕鬆很小品！不過可能你還未聽過這首歌。沒關係，現在去聽聽看吧！

『我知過份  鍾意玩捉錯用神 明知你   最後亦無份 亦任你犧牲

我知過份 冇鍾意都俾訊號人 無聊請你現場助慶 就算寵物亦會得到個熱吻』

我很喜歡這首歌。翻查資料，才知道這首歌原來是伍樂城和黃偉文的『新廣東歌運動實驗2號』。如果我沒有記錯，這首歌應該是有派台的 - 畢竟是新曲加精選裡面的唯一一首新曲嘛！但這首歌好像不是太popular。也難怪：第一，這首歌跟楊千嬅的個性實在是『大攬都扯唔埋』；第二，誰人會願意承認自己是歌詞中形容的那個，呃，『收兵女人』？但不popular的歌其實反而更有研究價值 - 這也是為什麼我的《向楊千嬅致敬系列》中cover的大部分都是side-track而不是hit爆金曲的原因。

何謂『收兵女人』？我想大家身邊也都會有這種女孩子吧 - 外貌還不錯，性格。。。還可以啦，嫵媚，溫柔，嬌滴滴，這些是一定的。而這些女孩子身邊，往往會有不同的男孩子在她身邊出出入入，幫忙做這座那：搬屋有A君；去shopping就搵B君幫手拎袋埋單；食貴野一定要同C君，因為佢有黑卡，埋單型D；平時悶就D君啦，講野夠幽默夠好笑，唔怕悶呀嘛；如果去旅行，of coz 要搵E君啦，唔但只識多國語言，仲有大把friend係外國，可能仲俾我識到個F君。

在普通女孩子的角度，這些女人完全是要不得：使人唔使本，勁衰囉！又唔係鍾意人，就唔好俾D錯誤signals人啦！而身邊沒有另一半的，尤其是還未開齋的（例如本人），心底裡一定是更不忿：有無搞錯，我咁好咁索又識尊重男人，點解D男人竟然咁無眼光，寧願為個咁嘅賤女人付出，都唔俾我為佢付出？

話是這樣說，但不能不承認，作為一個正常女人，在最最心底的那個位置，還是虛榮的： 可以吸引男人為自己仆心仆命，嘩！我都想呀！唔使多，兩三個我就好夠啦 - 這也解釋了為什麼普通女人會對這種女人有一種莫名的敵意。不過，講真個句，如果D男人竟然俾D咁嘅女人吸引到，佢絕對唔會係 my cup of tea 啦！咁我理得個女人點對個男人，個男人又點為佢付出呀？

而在男人的角度，這些觀音兵自然也是十分要不得的：簡直就係敗壞男人嘅名聲啦！D女人叫你做咩就做咩，你仲係男人黎嘅？你無主見架？無威嚴架？為左媾女搞到自己咁節墮！你唔好同人講你識我添呀！這等等等等的不滿聲音，未聽過也可以估到。

說實話，我其實也很好奇為什麼平常那麼重視面子的男孩子會願意這樣付出。除非他是傻的，不然的話其實也很容易估到自己是兵呀！但昨天，我發覺自己的好奇實在來得太無聊。因為，男人的好勝心實在是超越了我的想像。如果他們可以為了贏一場枱波而努力練波，不肯離開酒吧，那為了得到那個大家都認為他不可能得到的女生無條件的付出其實也並不難理解呀！尤其是他還沒得到她，而他又很想得到她 - 吃不到的葡萄係酸嘅，知無？好勝心以外，我也不排除男孩子會因為英雄心理作祟而不折不撓 - 我要感化佢！佢其實好善良好純真架！只係佢受蒙蔽之嘛！再唔係，就係佢太愛佢啦！

不過，我要再一次證明我與平常女生 - 甚至男生 - 的看法是很不一樣的。我不覺得這些女生討厭，也不覺得她們可惡。首先，『牛唔飲水唔禁得牛頭低』，人地一個願打，一個願挨，你地D三姑六婆嘈咩呀？人地都唔知幾enjoy幾happy呀！付出唔一定係辛苦架！係過程中人地都有甜頭架！唔係你估佢仲肯做咁多野咩！個女仔就更加唔使講啦！而老實說，我其實覺得那些女生還蠻可悲的。不要以為我嫉妒，我羨慕，所以才這樣說。我真的壓根兒沒有這樣的感覺。因為當一個女人的生命要依靠無數個男人去證明自己的存在價值，其實是很可憐的：如果她的生命裡沒有男人了，她還可以怎麼辦？

當然啦，我並不覺得這些女生會這樣想的：你無兵，梗係咁講啦！所以，我覺得Wyman實在是過分美化了這些『收兵女人』了：你問下呀，佢會唔會『我有時其實  都知道慚愧 我錯誤吸引一個人 訓練成類似男朋友錯體』呀？我先舉手，我唔信佢會咁諗！

Well，雖然我係無呢D傻仔係我身邊，so what？至少我有我自己呀！傻豬呢嘅，你估靠《傻仔》好穩陣呀！男人黎架！穩陣就唔係男人啦！